係，又係日本。幾日前嚟做嘢，呢次就係一早Book好同屋企人嚟嘅旅行，咁啱得咁橋。平時成日賴床，但一去玩就鬼死咁精神；今日特登較鬧鐘七點起身，喺去飲飲食食之前嚟個Morning Run。
唔少朋友都知我係村上迷，佢講過，自己喺東京嗰陣多數喺明治神宮外苑練跑，「那地方雖然無法與紐約中央公園相比，但在東京來説是塊難得的綠地」；帶啲朝聖心態，又加上近，所以就揀咗呢度。
坐JR中央線喺信濃町站落車，行三、兩分鐘就到，好易搵，未夠八點，已經有唔少跑者跑緊。喺綠油油嘅環境下慢Jog 5K，沿途經明治神宮球場同紀念繪畫館，的確幾舒服。沿外苑一圈大約1.3K，路面有標示，所以距離時間都「好好計」；好處仲有路面寬闊平坦，唔駛成日左避右避，無論跑步定散步都非常適合。不過由於條路嘅另一邊係車路，仲有個首都高速入口，不時有大車經過，喺清新草味之外亦都少𣎴免吸到些少廢氣，呢方面香港維園就較優勝；不過維園緩跑徑稍窄，經常要「扭人」，各自有辣有唔辣啦。
總括而言，今朝晨跑嘅感覺非常好。微涼天氣加上青草大樹，係一個唔錯嘅上午。 #Tokyo #NikeLunarEpicLowFlyknit2 #NikeRunning
Search